موضوع: رمضان بين الربح والخسران .. نصيحة وفضفضة! الثلاثاء يوليو 19, 2011 3:36 am
بسم الله الرحمن الرحيم
أيام معدودة ويقبل علينا شهر رمضان المبارك شهر الرحمة والغفران الشهر اللذي أنزل فيه القرآن وفيه أنزل الوحي على نبينا صلى الله عليه وسلم
لأحد منا يجهل فضل هذا الشهر العظيم وميزته بين الشهور ولكن للأسف الأغلبيه مقصرين رغم سماعنا وقرائتنا للأحاديث والأيات في فضل شهر رمضان!
تختلف الإستعدادات لرمضان من شخص لشخص وذلك على حسب إيمانه!
هناك من ينتظره بشوق لمشاهدة المسلسلات والبرامج اللتي تضج بها القنوات!
وهناك من ينتظره شوق إلى الأكل والجمعات في الإستراحات والفله على قولتهم!
وهناك من ينتظره بشوق لكِ يصحح مساره ويتوب ويطلب العفو والمغفره ويبحث عن إغتنام الفرصة المتاحة في هذا الشهر الفضيل وللأسف هم قله قليله!
أنا وأعوذ بالله من كلمة أنا ابي أتكلم عن نفسي كمثال واقعي وليس مسئلة رياء او مثاليه والله أعلم بنيتي!
أنا كنت من اللذين يشتاقون لرمضان من أجل المسلسلات والجمعات والطاعات أمر ثانوي عندي!
يمر رمضان سنه تلو السنة وأنا لأحس بفرق في نفسي اللهم اني أفتقد البرامج التلفزيونيه!
لكن بعد ماصحيت من غفلتي وعرفت ان الدنيا فانيه والنعيم زائل ولا يبقى سوا العمل الصالح أنتبهت وأصبحت لأفوت شهر رمضان والقيام والصيام فيه واسئل الله الثبات!
أستغرب من حال اغلب الناس اليوم يدعون الصوم وصحيح هم صائمون لكن عن الأكل فقط!
صائم لكن عينه ترى المتبرجات الخليعات!
صائم وتطرب أذنه لسماع المعازف!
صائم ويكلم حبيبته في نهار رمضان!
صائم ويطلق لسانه بالسب واللعن والغيبة!
أمر غريب صراحة!
الشياطين تصفد في رمضان لكن شياطين الجن فقط!
شياطين الإنس قامو بدورهم وربما أقوى!
سؤال دايم على بالي ليش رمضان بالتحديد تضج القنوات فيه بالبرامج والمسلسلات والخلاعة تكثر فيه؟ هل هناك مقصد! مأتوقع انها مجرد مصادفة في هالشهر الكريم!
الا على الطاري وش سر هالنشوة اللي تجي في رمضان ض1 والله يايجني إتصالات على جوالي مع الفجرية خاصة والمغزلجيه يعلموني يقولون البنات يصيبهم بلا في رمضان وكم وحدةً أتصلت على رفيقً لها قديم جابها الشوق في رمضان عاد
أنا متأكد انه تأثير المسلسلات من يوم تصبح لين تمسي وهي تشوف حب وغرام ثم تدور له أدمي تفرغ له مشاعرها
وبعدين هاللي مدمنين مسلسلات مدري كيف مايتشتت فكرهم مسلسل سوري هياط وهواش ثم مسلسل خليجي غزل وحزن ثم مسلسل بدوي معارك وقصيد ثم مسلسل كوميدي والله لأنهبل لو أسوي مثلهم
والله مامثل الصوم بالديرة لا تلفزيون ولا نت ولا شي من المسجد للبيت اللي نفطر فيه الفتن قليله هناك للي يبي يزهد!
أنا حتى النت أقاطعه حتى كواليس تورع عشان الصور النسائية لأني ابي صوم نقي لكن هالسنة الله يستر مأعطل من الصيفي الا في العشر الأواخر وساكن عند عزاب اما اني ابي اجاهد نفسي ولا ضعت معهم!
نصيحة لي و لكم من كل قلبي صومو عن كل شيئ محرم والله لتحسون بلذة الصوم ولتشوفون تأثيره عليكم مستقبلاً إذا كان مقبول لأن العمل المقبول عند الله يكون له تأثير!
وأستغرب من ناس يسهر للفجر ثم نومه لين المغرب وأحيان يعدي وقت الفطور وهو نايم يعني أقمت ركن الصيام وتركت ركن الصلاة والعياذ بالله!
كيف يقبل صومك وهو ناقص بدون عباده؟
وبعضهم إذا أذن المؤذن أنطلق يشرب مويه كأن طعمها ومفعولها غير هالوقت! مادرى انه يجرح صومه او ربما ينقض صومه لأن العلماء أختلفو في الحكم لكن الأفضل هو الإبتعاد عن الشبهات!
واللي يغثني بعضهم يقوم العصر ثم ينتظر إلى المغرب يوم يجي يقول والله جوع وضما اليوم! ضما من الجلوس تحت المكيف يعني انه ماشاف صبيان الأبل من الساعة سبع وهم ماشين مع نياقهم لين الساعة 10 ثم رجعو وجلسو في خيمة في هالحر والله يوم اجيهم المغرب فاتحين افواههم من الضما يقولون مانبي الا موية وثلج!
والحريم عندنا عسى الله يكتب لهم الأجر من الضحى لين المغرب وهي في وسط هالحر في المطبخ تسوي فطور لأن نظامنا حنا غير الديرة نصين ويتفاطرون بينهم حريم ورجال!
هذولا الناس اللي يحسون بالصوم الله يكتب لهم الأجر
وأستغرب من بعض الناس في رمضان من أزهد الناس وإذا قالو بكرة العيد قلب 180 درجه!
هو شي طيب انه عرف الله وصام بخشوع لكن وين التأثير؟ هذا إن دل على عدم قبول العمل والعياذ بالله!
كثير من الناس زاد إيمانهم بسبب رمضان وأصبحت مخافتهم لله أقوى من قبل وبعضهم ترك الدخان وبعض المحرمات لأنهم عزمو وصفو النية فوفقهم الله!
انا يسئلوني بعض الشباب الله يصلحهم بالله وشلون تعيش رمضان بدون طاش ماطاش؟ وبدون مسلسلات يعني تحس له طعم!
كنت اقول هالكلام وانا صغير مأتوقع أصوم عن التلفزيون بالذات لكن لذة الإيمان اقوى من لذة الحرام وهم يجهلونها!
الدنيا مالها أمان يمكن أنا ياكاتب الموضوع مألحق رمضان! يالله حسن الخاتمه بس رمضان يمر بذكرى أليمه وجميله في نفس الوقت!
أليمه بوفاة ولد خالي كان معزوم عندنا بالديره وصدم ناقة مع اخوه قبل يوصلون لنا والوقت لحظة غروب الشمس لكن أكرمه الله بهذه الخاتمة الحسنة اللتي أتمناها ونطق الشهادتين وهذا هو اللذي يسعدني كل ماتذكرت هذه الفاجعة!
الكلام يطول والمعذرة على الإطالة لكن والله في داخلي كلام كثير وودي اقوله وعساني وصلت الفكرة بها الأسطر القليله!
اللهم بلغنا رمضان وأكتب لنا فيه العفو والغفران
الموضوع فضفضة مضمونها نصيحة واسئل الله لي ولكم الأجر
جْــنـــسَــے
الثلاثاء يوليو 19, 2011 3:36 am
